ليلة الأمس كانت حافلة للغاية
بدأتها بالمرور على مستشفى نفيسه الحصرى ( ده سعادتكم اسم المستشفى الجامعى بتاعتنا ) ومحدش يسألنى ليه اسمها كده إلا لما يعرفنى ليه مستشفى أحمد ماهر ، والدمرداش ، وغيرها اسمهم كده
المهم ، ذهبت إلى المستشفى ، علشان أحضر النوبتجية بتاعتى، دورت على النائب ( الطبيب المقيم ، فى رواية أخرى ) ، قالى انت جاى ليه ، احنا مشينا العيانيين خلاص ، والقسم فاضى ... يعنى خلاص
قلت فى نفسى : بركة يا جامع ، وحيث انى كنت ناوى على البيات برة ، ومش عايز أروح بخفى حنين ، قلت بس ، مفيش غير المستشفى العام ، أروح هناك أحضر أى حاجة تفيدنى
مش هحكى ليكم كتير أنا رحت فين وشفت ايه
هحكى ليكم بس عن غرفة العمليات اللى أنا حضرت فيها 3 عمليات ،
مش هكتر عليكم
هحكى بس عن شوية ملاحظات أنا شفتها :
* غرفة العمليات عاملة زى سوق الثلاثاء ، أو الأربعاء أو الجمعة ( كل واحد وسوقه ) يعنى ايه ، مليانة ناس ، متعرفش بيعملوا ايه ، وكل واحد شغال فى سهراية ، دى طبعا غير السهراية بتاعة العملية ، والصوت عالى ودوشة ... حاجة تخليك فعلا تركز بضمير
*واضح جدا انهم مسمعوش فى المستشفى العام عن حاجة اسمها ( ماسك ) كمامة يعنى ، أو ( أوفر هيد ) طاقية عمليات ، مشفتش غير دكتور واحد لابس كمامة ، مش عارف ارتكب الغلطة دى ازى!! ، وطبعا الدكاترة بيعملوا العملية ووشهم عريان وبقهم وشعرهم ، وياسلام بقى لو فيه قفشة أو نكتة أو حدوته حلوة أثناء العملية وواحد منهم حب يضحك بضمير وتطاير من بقه شوية حاجات فى بطن العيانة
* فيه دكتور كان شغال ، هيكمل العملية يعنى ، فبدأ بالمشرط وهو لسه ملبس الجوانتى فى ايده الشمال !! يعنى فتح بطن العيان وهو بيلبس الجوانتى، وأحلى ما فى الأمر انو خلص الجزء المهم من الشغل ، فساب الحالة لدكتور علشان يقفل بقى العملية ويخيط وكده ، وراح فك تعقيمه وولع سيجارة فى غرفة العمليات ، وهو واقف بيبص ويتابع ايه اللى حصل !!
*حتى أساسا أسلوب لبس الجوانتى ، طول عمرى أعرف ان الواحد بيلبس الجوانتى من غير ما يمسكه بايده ، الممرضة بتفتحه والدكتور يمد ايده هوب بحركة بهلوانية ويلبس الجوانتى ، اللى أنا شفته بقى ان الناس بيمسكوا الجوانتى ويلبسوه بايدهم عادى يعنى ، كأن ايدهم دى طالعة من فرن التعقيم ومعليهاش ولا ميكروب !! إلا هم بيتعبوا نفسهم وبيلبسوا الجوانتى ليه ؟!!
* أى حد ممكن يدخل غرفة العمليات وحتى بلبس الشارع وبالجزمة عادى يعنى ، وبما اننا قلنا ان مفيش اوفر هيد ، فبالتأكيد مفيش أوفر شوز !
كفاية كده عليكم المرة دى وإلى اللقاء مع سويعات أخرى ودمتم فى خير صحة وأحسن حال
ليست هناك تعليقات:
إرسال تعليق